بالصور.. أغرب أسباب «فسخ الخطوبة»
يندرج انفصال شخصين مرتبطين في أغلب الأحيان تحت مسمى القسمة والنصيب، ولكن في بعض الأحيان يكون سبب انفصالهما تافها للغاية ويعتبره البعض "تلكيكة" ليتخلص أحدهم من الآخر.
في إطار ذلك سرد رواد موقع التواصل الاجتماعى فيس بوك عبر صفحة "برايد جروب" "أتفه" وأغرب أسباب فسخ الخطوبة.
عريس أحسن من خطيبها
قالت ريهام:" بسبب مفرش سرير"، وأضاف أحمد:" عشان جالها عريس أحسن من خطيبها آه والله".
خدوا الدهب وهاتوا مكانه فلوس
وروت مي:"أنا بقي حصل معايا موقف عجيب شوية، كان في واحد متقدملي المهم وافقت للأسف، ونزلنا عشان نشتري الشبكة عمل كام حاجة قال إيه وإحنا بنعدي الشارع عاوز يمسك أيدي ويعديني، أنا كنت عاوزة أقوله بعرف أعدي لوحدي وربنا بس بعدت عنه ومشيت عادي، بعد شوية عايز يحط إيده ع كتفي ويقرب مني كدة، وهو بيكلمني وصلني الصراحة، وقولت إيه الواد النطع ده، المهم جبنا الدهب روحت قولت لماما أنا مش مرتاحة عشان حصل منه كذا كذا قومي يا ماما تروح تعمل بعض التحريات، المهم عرفنا حبة حاجات كده، فقولت خلاص مش هينفع أكمل، وأخويا كلمه وقاله كل شيء قسمة ونصيب، وهنا الفاجعة بقي خدوا الدهب وهاتوا مكانه فلوسنا ياجدع إزاي الكلام ده ما الذهب معاكم أصلا، وأنا أقسم بالله ما فاكره شكل الحاجة إيه لأن اللي حصل يوميها خلاني مش مركزه معاهم، وبعد ما اشترينا الشبكة أخدها معاهم البيت ما علينا، ويقول لأخويا طيب عايزين حق الشيكولاتة والحاجة الساقعة اللي جبناها وإحنا جايين".
عايز واحدة تكوى الشرابات
وتذكرت دنيا:" كان صالونات وأول مرة أشوف طلته البهية وجاي يقول أنا لازم مراتي تكويلي الملايات والشرابات، اتاوبت وقلت لماما يلا عشان عندي شغل بدري".
مش بتلبس ضيق
وقال محمد:" فسخت خطوبتها مني عشان اشتغلت في الفاكهة، طيب ما أنا معايا بكالوريوس ومش بشتغل بيه، اقعد جنب أمي يعني واخد مصروفي منها".
وأضاف أحمد:" فركشوا عشان مامتها كانت هتتجوز، فهو اضايق وخاف عليها من كلام الناس فاتعصب عليها وفضل يغلط في مامتها، فهي زعلت وقلبت بخناقة كبيرة بينهم وسابوا بعض وبعدها مامتها متجوزتش والبنت اتجوزت وخلفت، وبعد 7 سنين لسه مش عارف ينساها ولا يحب غيرها".
وروت مني:" علشان مش بتلبس ضيق، شوفتي الخيبة"، وقالت سمر:" حطيت رجل على رجل قدامه".
البيت اللى في وشنا واقع
وقالت آية:" انا كان متقدملي واحد وفسخ عشان مش من مستواه إن خطيبته يبقي البيت اللي في وش بيتها واقع والشارع مليان طوب".
وقالت هاجر:" أنا فسخت الخطوبة علشان وإحنا في المعرض بنشتري السيراميك مامته وأخته اللي كانوا بيختاروا ولما اعترضت على لون الحمام اعترضوا فرميت الدبلة في وشه ومشيت، كاته نيلة ابن أمه".
خناقة على مين يقعد جنب العروسة
وأضافت ندي:" اتخنقوا يوم الخطوبة نفسها على مين يقعد في العربية مع العروسة أخت العروسة ولا أخت العريس".
شعرها مش ناعم أوى
وقالت دونا:" واحدة صاحبتي غسلت شعرها ورحولها عريسها وحماتها وشافوا شعرها، قالوا لها ايه ده إحنا مكناش نعرف أن شعرك كده أصله مش ناعم أوي واتفركشت الخطوبة".
وأضافت ضحي:" يوم نقل العفش فركشوا عشان اختلفوا على مين هيحاسب العربية اللي نقلت العفش".
